ENTROIDAR

Galicia, 2020 - 72 minutos. Director: Pablo Cesc Marco.

Entroidar é un documental que se asenta en tres piares fundamentais: os personaxes que fan Entroido, os lugares nos que se fai Entroido e a propia celebración do Entroido. Buscamos tombar mitos. Laza é un concello con múltiples lugares nos que tamén se celebra o Entroido. O Entroido non son soamente cinco días. Comeza dende o comezo do ano no que os chocos xa comezan a ruxir pola contorna. O Entroido de Laza son os peliqueiros, pero tamén as formigas, as madamas, os maragatos... As figuras do Entroido, quen está detrás... Queremos ver como se transforman as persoas que están detrás dos personaxes que se dan no Entroido.
O documental non consistirá nunha recompilación de declaracións, senón en realizar un seguimento de diferentes referentes desta celebración, e non soamente en amosar as imaxes que xa vimos na televisión, senón en coñecer as súas vidas, que é o que significa o Entroido para elas e eles. A condución da historia correrá a cargo dun “consello de sabios” que conversarán entre si para esclarecer e narrar o acontecer dos feitos.

NA PROCURA DA LUZ

Galicia, 2020 - 18 minutos. Directora: Rosa Taboada.

Curtametraxe documental sobre a figura de Luz Pozo Garza, poetisa galega, membro da Real Academia Galega, dos seus derradeiros anos vista polas persoas mais achegadas a ela, tanto no eido persoal coma da súa obra. Distinguida co Premio "Xohana Torres" 2021 polo Concello de Santiago de Compostela e a USC.

E SE NON É COVID?

Lugo, 2021 - 5 minutos. Director: Antonio Lence Castro.

Axudante de Dirección: Rocío Rodríguez Rodríguez.
Produtora: Gabrieles Enteléticos. Actrices: Sabela Vázquez Ramos, Paula Vázquez Ramos.

Este ano pasamos por experiencias estresantes e difíciles por mor da pandemia, confinamentos e cuarentenas están a orde do día pero non todo o mundo o leva da misma maneira. Pero... e se non é covid?